Gevreesde siektes en finansiële welstand is onlosmaaklik aan mekaar verbind. Om hierdie rede behoort risikodekking ‘n noodsaaklike deel van jou finansiële beplanning te wees.
Moenie vrees as jy weet jy’t dekking
Deur Nico van Gijsen • Rapport: Raad met jou rande • 09 Junie 2024
Dodelike siektes se hospitaalkoste net druppel aan emmer
Jou gesondheid is die begin van alles.
Ongelukkig ook die einde.
Ek wonder hoeveel mense dink oor die waarde van hul eie gesondheid wanneer hulle finansiële beplanning laat doen?
En tog word dit baie keer afgeskeep in finansiële beplanning. Jy is gesond. En jy sal só bly.
Hoe verkeerd.
Dit is mos baie meer romanties om te praat oor beleggings en die groei in jou portefeulje as om geld te moet uitgee op risikodekking. Wie wil tog oor polisse gesels?
Ek wil.
En vandag wil ek spesifiek kyk na finansiële voorsiening om jou gesondheid te beskerm, en spesifiek gevreesde-siekte-dekking. Daardie polis wat sal uitbetaal sou jy ‘n gevreesde siekte opdoen soos kanker, ‘n beroerte, ‘n hartaanval, Alzheimer se siekte, ensovoorts.
Dit kan jou enige tyd tref. Nee, dit gaan jou tref as die noodlot nie vooraf anders bepaal het nie.
Een uit elke agt mans gaan prostaatkanker kry. Ironies genoeg is dieselfde statistieke van toepassing op vroue en borskanker.
Jy hoef niks verkeerds te doen nie. Jy kan so gesond en fiks wees soos jy wil. Jy is nie immuun daarteen nie.
Ek deel ‘n paar gedagtes oor wat ek sien en hoor.
Mediese skema
Vergeet maar eers die nuwe Wet op Nasionale Gesondheidsversekering. Daar gaan nog sommer baie water in die see moet loop. En met ‘n spul ANC-kaders in beheer (in koalisie of nie) weet ons uit 30 jaar se ervaring daar sal seker meer gesteel word as wat dit die armes tot voordeel sal wees.
Maak seker jy is lid van ‘n mediese skema. Kry die beste opsie wat jy kan bekostig.
Die harde waarheid van die lewe is dat jy nie topgehalte-diens kan verwag teen ‘n minimum tarief nie. Niks werk só nie. Jy kry waarvoor betaal.
Baie kies ‘n sogenaamde hospitaalplan. Dit is bloot nie goed genoeg nie. Deesdae word mense, selfs na groot operasies, ‘n dag of twee later uit die hospitaal ontslaan. Die groot koste vir behandeling van ‘n gevreesde siekte kom na die hospitaaltyd.
En daardie sogenaamde gap cover? Kyk hom mooi. My vrou wys my nou die dag op ‘n bekende maatskappy wie se gap cover vir kanker net geldig is tot ouderdom 60 jaar. Kies maar op watter ouderdom jy jou kanker wil hê.
En dan die rede wat ek sien min mense mooi verstaan. Met ‘n goeie mediese skema sal jy baie gemakliker dokter toe gaan vir gereelde ondersoeke as wat die situasie sou wees as jy elke keer uit jou eie sak moes betaal. Dan kan skete en kwale vroeër raakgesien en behandel word. En die verskil beteken tussen ‘n langer en gesonder lewe of ‘n kortpad die ewigheid in.
Maak baie seker oor wat jy koop. Koop volgens risiko, nie volgens premie nie.
lnkomstebeskermer
Ek noem hierdie tipe risikodekking spesifiek na aanleiding van iemand van wie ek nou die dag gehoor het wat borskanker opgedoen het.
Sy was teen die planke. Wou terstond vroeg aftree.
Baie mense het mos in sulke omstandighede te se jy moet maar gewoond raak aan die “nuwe normaal”.
Sê hulle moet liewer hul mond hou.
Dit is ‘n behandelingsproses waardeur jy gaan. Daar is niks van “nuwe normaal” nie. Jy het nie jou waarde verloor net omdat jy siek is nie.
Ja, daar gaan ‘n nuwe normaal kom, maar eers later. Maak dan seker jy het beheer daarvan. Moenie dat omstandighede alleen jou lewe bepaal nie.
Ons raad aan hierdie vrou was presies dit wat ek hier noem. En, gaan rus. Neem siekteverlof. Jy het inkomstebeskerming deur jou werkgewervoordele. Gebruik dit.
Gevreesde-siekte-dekking
Ek het hierbo kortliks verwys na waarvoor hierdie polis nodig is. Jy sien nie kanker kom nie. Jy sien nie ‘n beroerte kom of enige van die ander nie.
As dit kom, is dit te laat vir dekking, maar die geldvereiste is daar.
Selfs die beste medieseskemaplanne dek jou nie vir alle uitgawes nie. In die meeste gevalle kan jy ook nie ‘n eie dokter of voorkeurhospitaal kies nie. Sou jy dit doen, moet jy dalk ekstra opdok.
Dan is jy bly vir hierdie stuk finansiële voorsiening wat jy gemaak het.
En die bonus? As alles verby is en jy is weer springlewendig en daar is ‘n groot klomp polisgeld oor wat jy nie gebruik het nie?
Begin oefen en gaan klim daardie berg oorsee. As dit nie jou ding is nie, bederf jou wederhelf, wat jou so mooi ondersteun het. Kortom, geniet jou nuwe kans op lewe, dit is die bonus.
Gevreesde-siekte-dekking is gewoonlik nie goedkoop nie. Dit is waarom jy dit moet kry terwyl jy nog jonk is.
‘n Manier om die koste daarvan te bestuur is om die gevreesde-siekte-dekking as ‘n versnellervoordeel van jou lewensdekkingspolis te kies.
Kom ons se jy het ‘n lewenspolis van R1 miljoen met gevreesde-siekte-dekking as versnellervoordeel van ook R1 miljoen. Dan het jy ‘n polis vir R1 miljoen.
Die polis sal óf by dood óf wanneer jy ‘n gevreesde siekte opdoen die R1 miljoen uitbetaal.
Een manier om daarna te kyk, is dat jy seker is die polis gaan uitbetaal. Jy gaan tog óf siek word óf doodgaan.
Nog raad
Gevreesde-siekte-polisse
Die doel van ‘n gevreesde-siekte-polis, waarna ek in die hoofrubriek verwys, is nie om jou mediese skema te vervang nie. Dit is aanvullend daartoe.
Die gevreesde-siekte-dekking betaal nie vir dag-tot-dag- mediese uitgawes nie. Dit betaal ‘n bedrag geld by diagnose van ‘n gevreesde siekte of ander siektes afhangende van die polisooreenkoms.
Benewens addisionele uitgawes – wat daar altyd is met ‘n ernstige siekte – is die bedoeling met die polis ook om die nodige lewenstylaanpassings te kan maak.
Van hierdie polisse het ook ‘n byvoordeel teen funksionele inkorting. Dit sal dus ook uitbetaal, gewoonlik afhangende van die graad, by funksionele inkorting en nie net by ‘n gevreesde siekte nie. Jy kry dus in een polis ook dekking teen ongeskiktheid.
Wees bedag op polisse met ‘n lang lys siektes wat gedek word. Dit is baie keer om verkope te dryf. Baie van die siektes is maar weergawes van ander waarvoor jy reeds gedek is.
Ek hou van die tipe polis wat jou dek vir ‘n kapitaalbedrag en uitbetaal met diagnose. Die vereistes is dalk ‘n bietjie hoër as polisse wat klein bedrae uitbetaal vir minder ernstige toestande, maar op die duur maak dit meer sin.
